Fiesta de San Sabastian

La Fiesta de San Sabastian, an Sendin, ye ua fiesta relegiosa i quemunitária mui lhigada a la eidentidade de la bila i a las sues tradiçones. An honra de l santo, ls Pauliteiros de Sendin tornórun a tomar parte nas fiestas, cumprindo las beilças rituales que durante geraçones fazírun parte deste momento.

San Sabastian ye mui amportante para Sendin por ser l patrono de ls Bombeiros Boluntários de Sendin, i la fiesta stá diretamente lhigada a la quemunidade i a la stória de la corporaçon. L santo ye tradicionalmente benerado cumo perteutor contra la peste i outras malinas, ua deboçon que tamien stá lhigada a las antigas procupaçones de las quemunidades rurales cula salude de las pessonas i de ls animales.

La participaçon de ls pauliteiros ten momentos cumo l peditório pulas calles de la bila, la procisson, las beilças i la tradicional Beilça de l'Alqueire. Antigamente, ne l peditório, las famílias oufrecien perdutos de la tierra, cumo trigo, fruita i fumeiro, qu'apuis éran rematados pa ajudar a pagar la fiesta.

Apuis de bárias décadas sin esta participaçon, ls pauliteiros de Sendin tornórun an 2024 a animar l peditório de San Sabastian, recuperando ua tradiçon que nun se fazie dende 1985. Esta buolta faç parte de l sfuorço de balorizaçon de las Beilças Rituales de ls Pauliteiros de Miranda nas fiestas tradicionales, refuorçando la lhigaçon antre la beilça, la quemunidade, la relegiosidade popular i la memória coletiba de Sendin.