Festibal Eibérico de Pauliteiros

La bila de Sendin, ne l cunceilho de Miranda de l Douro, tornou a afirmar-se cumo un de ls percipales palcos de la cultura tradicional de la Penínsla Eibérica cula XII eidiçon de l Festibal Eibérico de Pauliteiros de Sendin, un eibento que juntou grupos de Pertual i de Spanha nua grande fiesta de las tradiçones, de la música i de la beilça popular.

Delantre de centenas de spetadores, l festibal dou ua nuite marcada pul cumbíbio antre pobos, pul antercámbio cultural i pula balorizaçon dun património eimaterial que cuntina a çtinguir la Tierra de Miranda, refuorçando ls lhaços stóricos i culturales antre ls dous lhados de la raia.

Un de ls momentos mais marcantes fui la buolta al palco de ls Antigos Pauliteiros de Sendin – Geraçon de 80, nua atuaçon chena de simbolismo i eimoçon, que lhembrou l cuntributo decisibo dua geraçon que tubo un papel fundamental na perserbaçon i çcubrimiento desta spresson cultural, hoije recoincida cumo un de ls maiores símbolos de la eidentidade mirandesa.

La nuite quedou tamien marcada pula houmenaige a Paulo Felgueiras i Belmiro Carção, dues figuras de refréncia lhigadas a la defesa i promoçon de ls Pauliteiros de Sendin. La çtinçon lhembrou l legado deixado por ambos, recoincendo l trabalho feito al lhargo de décadas na perserbaçon desta tradiçon secular.

Al lhargo de l festibal, ls defrentes grupos apersentórun coreografies i anterpretaçones que mostrórun la riqueza de l património etnográfico eibérico, fazendo de Sendin un berdadeiro ponto d'ancontro antre culturas, geraçones i tradiçones.

Mais do qu'un spetáculo, l Festibal Eibérico de Pauliteiros de Sendin tornou a afirmar-se cumo un amportante momento de balorizaçon de la cultura popular, ajudando a mantener biba ua heráncia única de la Tierra de Miranda i a promober un património que cuntina a atrabessar geraçones, perserbando la memória i la eidentidade dun pobo.