Fogueira de l Galho
Ls palos que beilçórun durante l'anho, árden na nuite que mantén biba la tradiçon!
Na madrugada de 24 pa 25 de dezembre, Sendin mantén biba ua de las tradiçones mais simbólicas lhigadas als Pauliteiros: la Fogueira de l Galho.
Ye a la buolta de l fuogo que ls pauliteiros se júntan pa fechar mais un anho. Nesse momento, son botados a la fogueira ls Palos Bielhos, ls palos ousados nas atuaçones al lhargo de l'anho. Mais do que solo quemar un oubjeto, este gesto repersenta l fin dun ciclo, nua tradiçon chena de simbolismo, fé i eidentidade.
Ls palos qu'acumpanhórun beilças, fiestas i momentos amportantes de la quemunidade son antregues al fuogo cumo modo d'agradecer l'anho que passou i pedir perteçon, salude i buona suorte pa l'anho nuobo. L fuogo ten, assi, un papel de renobaçon: lieba cun el l que quedou para trás i abre caminho pa un nuobo ciclo.
Apuis, la tradiçon ganha inda mais sentido. A la buolta de la fogueira júntan-se pauliteiros i pauliteiras de defrentes geraçones, elemientos que cuntínan an atibo i antigos elemientos que bénen para este momento special. Antre cumbersas, música i beilça, ls mais nuobos ancóntran-se culs mais bielhos i la tradiçon passa de geraçon an geraçon.
Ye un de ls momentos an que se bei que ls Pauliteiros son muito mais do qu'un grupo de beilça: son ua quemunidade unida pula memória, pula tradiçon i pul sentimiento de pertença. Na Fogueira de l Galho, defrentes geraçones tórnan a beilçar juntas, fiestejando aquilho que recebírun de ls que benírun antes i aquilho que cuntinaran a passar als que benéren apuis.
